O NÚCLEO DE SANTO ANDRÉ DE TEIXIDO RECIBIU ARREDOR DE 70.000 VISITANTES DE XUÑO A SETEMBRO
A tempada turística deste verán confirma a boa resposta que está a atopar a aposta do Concello de Cedeira polo ocio activo e o atractivo crecente do núcleo de Santo André de Teixido, que recibiu entre xuño e setembro arredor de 70.000 visitantes. O goberno municipal impulsou un ano máis diferentes programas de visitas e rutas guiadas, favorecendo o coñecemento do territorio da man de empresas locais e contando co importante impulso que significa estar no corazón do Xeoparque Cabo Ortegal, recoñecido pola Unesco.
O núcleo de Santo André de Teixido tivo a maior concorrencia nos meses de xullo e agosto, con 25.000 e 31.000 visitantes segundo os datos extraídos do sistema de control de afluencia que o Concello instalou xa no ano 2024. Alí, o guía Sergio Muíño, especialista en Turismo e fundador da iniciativa Eufundevivo, encargouse de atender a caseta de turismo e de realizar un ano máis os “Paseos dos Vivos”, percorridos nos que se explican as lendas e a historia deste enclave máxico, a prezos bonificados polo Concello. Muíño realizou tamén os paseos culturais pola vila de Cedeira. En total, nas visitas a Santo André e polo casco urbano participaron máis de 450 persoas entre xuño e setembro.
O informe elaborado por Sergio Muíño sobre o perfil das persoas que participaron en ambos os dous programas, o de Teixido e os paseos culturais, apunta que practicamente a metade do total é de orixe nacional, principalmente e por este orde, de Madrid, Andalucía, País Vasco, Asturias, Murcia e Aragón. A maior parte da outra metade son visitantes de Galicia e o seguinte grupo máis importante é o internacional (Francia, EEUU, Alemaña, Reino Unido, Holanda, Suíza e Portugal), seguido, no último lugar, polo perfil local. Cómpre apuntar tamén que o da “Cedeira Mariñeira” foi un dos roteiros con mellor acollida e que neste final de setembro o Concello promoveu, con Muíño, a posta en marcha dunha nova ruta temática, a da serie televisiva “Rapa”. O percorrido inaugurouse o pasado 25 de setembro, coas 15 prazas dispoñibles esgotadas desde o mesmo día que se anunciou a actividade, e a previsión é incluíla na próxima programación de paseos culturais, durante as festas de Nadal.
Un ano máis, o verán é tempada de alta afluencia á Senda do Santo, a única vía ferrata de Galicia. Máis de 3.800 persoas acudiron a realizar este percorrido polos cantís da Capelada, superando pontes colgantes, travesías de grampas e unha tirolesa de 45 metros, entre outros retos, con paisaxes espectaculares como telón de fondo. Máis dun centenar de persoas achegáronse xa este verán ao novo parque de aventuras Senda Park, para gabear entre as árbores e participar en diferentes xogos e desafíos en altura acaídos para todos os públicos.
Contou tamén cunha alta afluencia o programa DeRuta, un ano máis promovido polo Concello da man da empresa local Portal Norte. Un total de 570 persoas de todas as idades participaron neste programa, que incluíu nesta edición 31 saídas entre mediados de xuño e o 30 de agosto. Tivo particular éxito o roteiro del Río Mestas, novidade deste ano, así como os itinerarios da Robaleira, a circular da Capelada ou a do río Condomiñas.
Na oferta de turismo activo encádrase a escola de escalada do Miradoiro dous Carrís, con 60 vías de diferentes niveis de dificultade. O Concello de Cedeira vai regular aínda o uso desta instalación, na que xa este verán escalaron varias decenas de deportistas federados e experimentados.
En canto á Oficina de Turismo situada no Palacete Municipal e o Castelo da Concepción, sumaron a visita de 3.500 persoas de xullo a setembro. O seu perfil foi tamén predominantemente nacional. A inmensa maioría dos turistas destacaron a beleza das paisaxes de Cedeira, a natureza e a súa gastronomía.