COIDAMOS CEDEIRA. SENSIBILIZACIÓN MEDIOAMBIENTAL ENTRE OS ESCOLARES DE CEDEIRA.

Dentro do proxecto do concello de Cedeira “Coidamos Cedeira” deseñáronse varios obradoiros sobre as problemáticas medioambientais que afectan a esta zona, ademáis de material didáctico complementario. A posta en valor do medio natural e o fomento do seu coidado son os principais obxectivos deste proxecto, dentro das axudas concedidas polo GALP A Mariña – Ortegal ao concello de Cedeira.

“Coidamos Cedeira” é un proxecto centrado na conservación dos recursos pesqueiros, marisqueiros e acuícolas, así como na mellora da calidade ambiental da zona costeira, a través dunha serie de accións que se levarán a cabo entre os anos 2024 e 2026.

Unha delas é a posta en marcha dun programa de investigación medioambiental sobre as problemáticas e oportunidades desta zona, co fin de incentivar a realización de estudos de este tipo no territorio.

A través destes obradoiros búscase concienciar ás novas xeracións sobre a importancia de conservar o medio ambiente, fomentando a valorización do ecosistema mariño e a explotación sostible dos seus recursos, a redución da contaminación derivada do uso do litoral que afecta ao medio mariño e aos recursos pesqueiros, e o aumento da conciencia social polo coidado da contorna.

Este proxecto foi impulsado polo Concello de Cedeira para financiación do Fondo Europeo Marítimo, de Pesca e de Acuicultura, a través das axudas outorgadas polo GALP A Mariña – Ortegal.