O CONCELLO DE CEDEIRA INAUGURA O VINDEIRO LUNS UNHA NOVA EDICIÓN DO PROGRAMA DE SENDEIRISMO “DE RUTA”
O Concello de Cedeira promove de novo este verán o programa De Ruta, unha iniciativa para descubrir e gozar coas paisaxes naturais do municipio que nesta edición abrangue un total de 31 saídas de sendeirismo. Serán guiadas pola empresa local de ocio activo Portal Norte e de inscrición gratuíta para as persoas interesadas. O calendario de andainas comeza xa o vindeiro luns 22 de xuño e contempla entre tres e catro percorridos cada semana -agás a segunda de agosto, polas festas- ata o 30 de agosto. A maioría delas comezarán as 10.00h, porén algunhas están pensadas para gozar do solpor e faranse a partir das 19.30h.
As saídas previstas neste mes de xuño son tres. A primeira será a ruta circular de Robaleira, que inaugurará o programa o vindeiro 22 de xuño, ás 10.00h desde a Oficina de Turismo. Son uns 8km de percorrido, con dificultade baixa ou media e desnivel acumulado de 400m, percorrendo o litoral que vai desde a praia da Madalena ata o faro, pasando por paraxes de moita beleza, como por exemplo a cala Mi Señora. Sairase desde a Oficina de Turismo e este percorrido repetirase outras tres veces ao longo do programa.
Para o mércores 24 de xuño está programada a ruta da Capelada, un percorrido sinxelo, tamén circular e con saída ás 10.00h. Comeza nos almacéns da serra e pasa polo curro e tamén polo río das Mestas. Repetirase outras tres veces durante o verán.
A terceira ruta deste mes de xuño será a dos Peiraos. Partirá ás 10.00h desde Purrido e percorrerá 7km, de dificultade media/alta, cun desnivel acumulado de 600 metros e paisaxes excepcionais, pasando pola ermida de San Antón de Corveiro, polas antigas garitas de vixilancia e por miradoiro espectaculares sobre o Atlántico. Tamén está programada outras tres veces ao longo do programa.
O resto das rutas que se van facer son a do río das Mestas, a dos altos de Santo André, a do Condomiñas e a circular de Herbeira. A primeira delas incorpórase este ano por primeira vez ao programa. Trátase dun percorrido de 5km que comeza no Porto do Cabo e que vai seguindo o curso do río Mestas, entre bosques autóctonos e pequenas fervenzas.
Para apuntarse hai que dirixirse á web da empresa Portal Norte: https://portalnorte.merkaki.com/
Nos carteis tamén hai un QR que levará directamente á central de reservas: https://www.supersaas.es/schedule/Portal_Norte/Rutas_Concello_de_Cedeira_2026