CONCELLO E COLEXIO DE AVOGADOS PROMOVEN CHARLAS DE PREVENCIÓN DA VIOLENCIA DE XÉNERO NAS AULAS

O Concello de Cedeira está a desenvolver, a través da Concellería de Igualdade e coa colaboración do Colexio de Avogados de Ferrol, un programa formativo arredor da igualdade, a prevención da violencia de xénero e os delitos sexuais e nas redes que vai dirixido a rapaces e rapazas de 12 a 16 anos. No marco do mesmo, esta semana celebrouse un primeiro obradoiro co alumnado de sexto de Primaria do CEIP Nicolás do Río, e está previsto que o vindeiro mes de xaneiro teña lugar outro cun grupo do IES Punta Candieira.

As charlas son impartidas por dous profesionais da avogacía con formación en igualdade e delitos sexuais e adscritos ao turno de Violencia. Nelas, ofrécenlles aos rapaces e rapazas unha visión xenérica sobre os problemas que a desigualdade de xénero produce na sociedade e explícanse contidos relacionados co fomento da igualdade, o respecto e a resolución pacífica de conflitos.